Pagina Inicial»Noticia
Parlamentu Nasionál liu husi sesaun plenária iha loron 22 fulan agosto tinan 2023, halo ona diskusaun no aprova Orsamentu Retifikativu tinan 2023, iha jeneralidade ho 41 votu a favor, 0 kontra no 23 abstensaun.
Diskusaun OR ne’e hahú ho leitura ba guiaun husi Sekretária Meza no kontinua kedas ba intervensaun Primeiru-Ministru, Kay Rala Xanana Gusmão hafoin relatóriu no pareser husi Komisaun C ne’ebé trata asuntu Finansas Públika.
Durante debate iha jeneralidade ne’e Deputadu sira konsentra makas iha estrutura orsamentu ho nia prioridade sira hodi ezekuta iha fulan haat nia laran.
Primeiru-Ministru garante ba povu tomak katak sei ezekuta no implementa programa sira ne’ebé governu identifika hanesan prioridade iha fulan hirak nia laran.
Ho aprovasaun jeneralidade ne’e, tuir guiaun ne’ebé aprova katak iha loron tuir mai tama kedas ba diskusaun iha espesialidade.
Sesaun plenária ne’e prezide husi Prezidente Parlamentu Nasionál interina, Maria Terezinha Viegas, akompaña husi membru Meza no hetan prezensa husi Primeiru-Ministru, Kay Rala Xanana Gusmão ho membru governu sira. FIM
