Pagina Inicial»Noticia
Prezidente Parlamentu Nasionál Interinu, Alexandrino Afonso Nunes, simu ona Proposta Orsamentu Retifikativu tinan 2023, husi Vise-Ministru Asuntu Parlamentar, Adérito Hugo da Costa, akompaña husi Vise-Ministru Finansas, Helder Lopes, iha loron 10 fulan agosto tinan 2023, iha Gabinete Vise-Prezidente Parlamentu Nasionál nian.
Proposta OR ne’ebé aprezenta ho montante biliaun 1.9 dolar amerikanu ne’e ho karater urjénsia tuir planu no nesesidade ne’ebé governu define.
Iha Proposta OR ne’e, Governu aprezenta mós Proposta Lei ba alterasaun dahuluk Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023 no Lei n. 2/2022, loron 10 fulan-fevereiru, kona-ba enkuadramentu ba Orsamentu Jerál Estadu no Jestaun Finanseira Públika no alterasaun daruak Lei n.8/2008, loron 30 fulan-juñu, Lei Tributária.
Prezidente Parlamentu Nasionál Interinu hatete hafoin simu Proposta OR ne’e Prezidente Parlamentu Nasionál sei konvoka reuniaun lider bankada sira atu deside ajenda diskusaun OR ne’e iha tempu badak tanba proposta ne’ebé Governu aprezenta mai Parlamentu Nasionál ho karater urjénsia. FIM
