Pagina Inicial»Noticia
Sekretariadu-Jerál Parlamentu Nasionál, liu husi Sentru Formasaun kontinua organiza formasaun iha área lideransa ba funsionáriu parlamentar-sira. Asaun formasaun ne’e, hanesan asaun kontinuasaun ba formasaun ne’ebé hala’o tiha ona iha tinan 2022 iha Munisípiu Aileu.
Formadu ne’ebé konvokadu ba asaun-ida ne’e mai husi funsionáriu-sira ho kategoria tékniku profissional no tékniku superior parlamentar ho total 22, no sei partisipa iha asaun formasaun, hahú husi loron 7 to’o 11 fulan agosto 2023, hola fatin iha sala formasaun João Paulo II, Comoro, Dili.
Asaun formasaun ne’e, hanesan parte husi programa formasaun jerál ne’ebé Sentru Formasaun promove, ho objetivu atu dezenvolve no konsolida di’ak liután koñesimentu funsionáriu parlamentar-sira kona-ba matéria-sira iha área lideransa-nian, ne’ebé kobre: komunikasaun, jestaun mudansa, jestaun rekursu umanu no planu estratéjiku. Formasaun ne’e realiza ho kolaborasaun ho dosente-sira Institutu Nasionál Administrasaun Publika (INAP)-nian.
Iha abertura, Sekretáriu-Jerál Parlamentu Nasionál, Mestre Edgar Sequeira Martins, solisita ba formadu-sira atu aproveita formasaun loron lima ne’e ho didi’ak, nune’e, bele sai bukae iha futuru karreira iha Parlamentu Nasionál, nune’e mos iha funsaun publika. Sekretáriu-Jerál mos agradese ba INAP tambá hatudu nafatin prontidaun atu apoiu no kolabora ho Parlamentu Nasionál iha fornesimentu dosente-sira ba asaun formasaun ne’ebé Sentru Formasaun promove. Liu tan, Sekretáriu-Jerál mos instrui Sentru Formasaun atu kontinua promove formasaun iha temátika seluk ne’ebé iha ligasaun ho servisu Sekretariadu-Jerál Parlamentu Nasionál-nian.
Iha sesaun abertura, konta ho prezensa Sekretáriu-Jerál Parlamentu Nasionál, Mestre Edgar Sequeira Martins, reprezentante Diretor Nasionál Formasaun INAP, Señór Policarpo. A. Boavida, no Xefe Sentru Formasaun, Lino Soares de Carvalho. FIM
