Pagina Inicial»Noticia
Parlamentu Nasionál liu husi sesaun plenária ordinária iha loron 7 fulan agosto tinan 2023, halo votu pezar ba falesimentu Irmã Ydalia Taveras, ho 54 votos a favor, 0 kontra no 0 abstensaun.
Votu pezar ne’e halo relasiona ho kontribuisaun Irmã Ydalia Taveras ba luta libertasaun nasionál liuliu ba vitima sira husi aktu violénsia forsa Indonézia nian.
Iha sesaun plenária ne’e mós anunsia ba distintu Deputadu sira kona-ba viajen privada Prezidente Repúblika nian ba Jakarta no anunsia mós kona-ba aprezentasaun kandidatu sira ba membru Komisaun Funsaun Publika ne’ebé eleje husi Parlamentu Nasionál.
Entretantu iha intervensaun diversa nian Deputadu sira informa kona-ba estasionamentu karreta no motorizada iha kapitál Dili, funsionáriu sira kuarentena ne’ebé fulan barak ona la simu osan han nian, traballadór barak sai husi sistema governu hanesan iha Koreia no Austrália, subsídiu veteranos ne’ebé balun ko’a, problema seguransa lorosa’e ne’ebé tinan barak seidauk rezolve, fasilidade ba guarda prisoneiro sira, folin sasán aumenta, la iha kualidade sasán konstrusaun inklui asuntu importante sira seluk.
Ba preokupasaun sira ne’e Vise-Ministru Asuntu Parlamentares, Adérito Hugo da Costa, hatete Governu liu husi ministériu kompetente sira kontinua rezolve no identifika nesesidade sira ne’ebé povu enfrenta hodi rezolve tuir prioridade no planu ne’ebé mak iha.
Sesaun plenária ne’e prezide husi Prezidente Parlamentu Nasionál em exercício, Deputadu Alexandrino Afonso Nunes, akompaña husi membru Meza sira no hetan prezensa husi Vise-Ministru Asuntu Parlamentares. FIM
