Pagina Inicial»Noticia
Delegasaun Parlamentu Nasionál ne’ebé xefia husi Prezidente Parlamentu Nasionál, Maria Fernanda Lay, akompaña husi Vise-Prezidente, Maria Terezinha Viegas, Deputada Sancha Margarida Tilman no Deputada Maria Angelica Rangel da Cruz dos Reis, partisipa iha reuniaun Asembleia Jerál ASEAN Inter-Parliamentary Assembly (AIPA) ba dala 44, iha Jakarta Indonézia, iha loron 5 too 10 fulan agosto tinan 2023.
Asembleia Jerál AIPA ne’e abertura husi Prezidente Repúblika Indonézia, Joko Widodo, ne’ebé hetan partisipasaun husi delegasaun membru sira AIPA nian hanesan Indonésia, Tailândia, Filipinas, Malásia, Singapura, Camboja, Vietname, Laos no Brunei Darussalam, exetu Myanmar tanba kestaun polítika rai-laran nian. No Parlamentu Nasionál Timor-Leste dezde fulan juñu tinan 2013, partisipa hanesan observador.
Iha sesaun plenária dahuluk, iha loron 7 fulan agosto, Prezidente Parlamentu Nasionál iha nia diskursu reforsa kompromisu Timor-Leste nian atu adere ba ASEAN no deklara vontade Parlamentu Nasionál hodi dezenvolve kooperasaun parlamentar entre membru sira AIPA nian.
Iha oportunidade ne’e, delegasaun Parlamentu Nasionál Timor-Leste mós halo reuniaun bilateral ho reprezentante Parlamentu Arménia, Japão, Geórgia, Ucrânia no Indonésia no mos ho Asia Parliamentary Centre.
Hafoin ida-ne’e, Prezidente Parlamentu Nasionál mós halo reuniaun bilateral ho Prezidente Kámara Deputadu Indonézia, Puan Maharani. FIM
