Pagina Inicial»Noticia
Parlamentu Nasionál liu husi Komisaun D ne’ebé trata asuntu Ekonomia no Dezenvolvimentu, halo fiskalizasaun iha Munisípiu Covalima no Manufahi iha loron 2 too 3 fulan agosto tinan 2023.
Atividade fiskalizasaun ne’ebé lidera husi Prezidente Komisaun, Deputadu Ricardo Batista ne’e hahú halo fiskalizasaun iha Munisípiu Covalima hodi observa diretamente perfurasaun Mina Matan sira hanesan Mina Matan Lafaek, Mina Matan Karau, Mina Matan Kumbili ne’ebé halo husi empreza Timor Resources Pty Ltd.
Durante fiskalizasaun refere, Komisaun D rona mós explicação no informasaun barak husi responsavel empreza Timor Resources Pty Ltd, kona-ba prosesu tomak perfurasaun ho nia analiza tékniku ekonómiku no seluk tan.
Hafoin observa Mina Matan iha Covalima, Komisaun D kontinua vizita fiskalizasaun iha Munisípiu Manufahi hodi haree Mina Matan Rusa.
Prezidente Komisaun D hatete fiskalizasaun refere halo atu Komisaun D bele hatene informasaun no prosesu tomak perfurasaun nian no planu esplorasaun iha futuru, tanba antes ne’e mós Komisaun D rona ona esplikasaun barak husi Ministru Petróleo, Timor Gap no Minerais inklui empreza rasik.
Nune’e Komisaun presiza rona parte hotu hodi buka solusaun ba polémika ruma ne’ebé akontese durante entre empreza ho Timor Gap rasik, hodi kontribui ba dezenvolvimentu nasionál. FIM
