Pagina Inicial»Noticia
Parlamentu Nasionál liu husi Prezidente Parlamentu Nasionál, Maria Fernanda Lay, simu ona Programa IX Governu Konstitusionál, iha loron 13 fulan jullu tinan 2023, iha Gabinete Prezidente nian.
Programa IX Governu ne’e entrega diretamente husi Vise-Ministru Asuntu Parlamentar, Adérito Hugo da Costa, ba Prezidente Parlamentu Nasionál.
Hafoin entrega, Vise-Ministru Asuntu Parlamentar informa ba jornalista sira katak, programa Governu ne’ebé aprezenta ho pájina 170 kompoin husi área prinsipál neen hanesan, afirma filafali Estadu Direitu Demokrátiku, Dezenvolvimentu Kapitál Sosiál, Dezenvolvimentu Infraestruturas, Dezenvolvimentu Ekonomia, Konsolidasaun Governativa no Boa Governasaun, no Kombate hasoru Korrupsaun.
Programa hirak ne’e governu halo ho objetivu atu hametin no otimiza setores governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentável 2030 nian no Planu Estratéjiku Dezenvolvimentu 2011 - 2030 nian hodi sai realidade.
Ho aprezentasaun programa ne’e, Prezidente Parlamentu Nasionál sei konvoka reuniaun lider bankada sira atu diskute no deside ajenda ba diskusaun programa refere. FIM
