Pagina Inicial»Noticia
Prezidente Parlamentu Nasionál, Maria Fernanda Lay, iha loron 28 fulan juñu tinan 2023, hahú simu bainaka hirak ne’ebé aprezenta nia pedidu audiénsia iha loron hirak nia laran.
Hafoin eleitu sai Prezidente Parlamentu Nasionál iha loron dahuluk reuniaun plenária VI Lejizlatura nian iha loron 22 fulan juñu tinan 2023, Gabinete Prezidente Parlamentu Nasionál simu ona pedidu audiénsia husi entidade relevante sira liuliu korpu diplomátiku sira.
Nune’e iha loron 28 fulan juñu ne’e, Prezidente Parlamentu Nasionál hahú reuniaun ho Koordenadora Rezidente ONU iha Timor-Leste, Funmi Balogun no tuir kedas ho Embaixadór Xina, Xu Danyang, hodi ko’alia kona-ba futuru kooperasaun servisu no aproveita mós hodi kumprimenta Prezidente Parlamentu Nasionál ba VI Lejizlatura nian.
Iha loron hanesan, Prezidente Parlamentu Nasionál mós halo entrevista espesiál ho Radio Televizaun Timor-Leste (RTTL.ep) ne’ebé ko’alia kona-ba planu no programa prioridade durante mandatu VI Lejizlatura inklui sentimentu hanesan feto ida-ne’ebé dahuluk lidera órgaun soberania daruak iha Timor-Leste. FIM
