Pagina Inicial»Noticia
Sekretariadu-Jerál Parlamentu Nasionál haruka funsionáriu na’in rua husi Divizaun Relasaun Internasionál, Kooperasaun no Protokolu ba Asembleia Repúblika Portugal hodi partisipa iha estájiu profissional ho durasaun loron 10 efetivu servisu nian.
Estájiu ne’e hola parte iha ámbitu programa kooperasaun entre Asembleia Repúblika Portugal no Parlamentu Nasionál Timor-Leste ba tinan 2023-2025, ne’ebé integra espesifikamente iha asaun 11 nian, ba apoiu dezenvolvimentu husi programa ida kona-ba Reprezentasaun Institusionál liga ba Relasuan Internasionál nian.
Ida-ne’e nu’udar asaun dahuluk ne’ebé mak implementa ona hafoin asina akordu, iha fulan janeiru tinan ida-ne’e, husi Programa Kooperasaun sira ne’ebé mak iha.
Durante estajiu iha Asembleia Repúblika, funsionáriu sira hetan treinamentu iha unidade orgánika oioin, ba dahuluk nian iha Diresaun Relasaun Internasionál, Kooperasaun no protokolu, tuir mai, iha Diresaun Apoiu Parlamentar no Divizaun Apoiu Komisaun sira.
Iha Diresaun Relasaun Internasionál, Kooperasaun no Protokolu, funsionáriu sira hetan no simu formasaun iha area oioin kona-ba prosedimetu sira iha atividade delegasaun parlamentar nian, prosedimentu sira iha ambitu kooperasaun nian, prosedimentu sira iha atividade Grupo Parlamentar Amizade nian, Protokolu Parlamentar, no organizasaun ba sesaun solene no seremonia ofisial nian.
Iha Diresaun Apoiu Parlamentar no Divizaun Apoiu Komisaun sira, funsionáriu sira simu formasaun kona-ba aprezentasaun husi Reprezentante Institusionál husi Komisaun Relasaun Internasionál ba Negosiu Estranjeiru no Komunidade Português liga ba oinsá mekanizmu akompañamentu nian, no apoiu asaun politika Estadu externa ho monitorizasaun asaun Governu nian bainhira iha doadór ba ajuda Dezenvolvimentu Internasionál nomos mekanizmu akompañamentu ratifikasaun sira ho implementasaun akordu no kompromisu internasionál sira, Komisaun Defeza Nasionál. Husi estájiu sira ne’e hotu, funsionáriu sira mós hetan formasaun ba lian portugues. FIM
