Pagina Inicial»Noticia
Iha ámbitu kontinuasaun formasaun ba kapasitasaun ba promosaun karreira, 20 funsionáriu parlamentar ho kategoria Administrativu Parlamentar konvokadu hodi partisipa iha formasaun Jestaun Eskritóriu durante semana ida, hahú husi loron 15 to’o 19 fulan maiu 2023. Para alem de funsionáriu-sira resente promovidu ba kategoria Administrativu Parlamentar, asaun formasaun ne’e envolve mos funsionáriu hirak ne’e durante ne’e ezerse ona funsaun iha kategoria mensionadu ne’ebé seidauk hetan oportunidade hodi partisipa iha formasaun similanse iha tinan kotuk.
Asaun formasaun ne’e hala’o iha Sentru Formasaun João Paulo II, Comoro, Dili, konta ho formador-sira husi Institutu Nasionál Administrasaun Publika-INAP. Matéria formasaun sei kompostu husi: komunikasaun no koordenasaun, jestaun, korrespondénsia, étika administrasaun no jestaun arkivu.
Iha abertura, Diretor Rekursu Humanus ne’ebé reprezenta Sekretáriu-Jerál husu ba formadu-sira atu partisipa ho másimu no aproveita formasaun ne’e ho di’ak hodi hakle’an no konsolida liu tan koñesimentu iha matéria ne’ebé sei fornese husi formador-sira. Akresenta liután katak, matéria hirak ne’ebé formadu-sira sei aprende liga barak liu ho servisu rutina iha servisu fatin, tambá ne’e importante tebes atu partisipa no aproveita.
Partisipa iha abertura, para alem de formadu-sira, Diretor Rekursu Humanus, Hélio Magalhães, reprezentante Diretor Formasaun INAP, Armando Amaral, Xefe Sentru Formasaun, Lino Soares de Carvalho, no funsionáriu-sira Sentru Formasaun Parlamentu Nasionál-nian. FIM
