Pagina Inicial»Noticia
Sentru Formasaun, paralelamente, organiza formasaun Literasia Digital no Prosesu Parlamentar ba funsionáriu-sira resente promovidu ba kategoria Administrativu Parlamentar no funsionáriu-sira Divizaun Apoiu Plenáriu-nian.
Asaun formasaun ba Literasia Dijitál hala’o iha sala reuniaun Grupu Mulher Parlamentar (GMPTL), konta ho partisipasaun 12 funsionáriu ho kategoria Administrativu Parlamentar ne’ebé resentemente promovidu ba postu refere. Matéria iha asaun ida ne’e kobre introdusaun ba komputadór, operasionalizasaun ba aplikasaun hirak ne’ebé utiliza diariamente iha servisu fatin, inkluindu pratika iha utilizasaun. Formador ba asaun ida ne’e, mai husi ekipa Divizaun Teknolojia no Informátika (DITIC) Parlamentu Nasionál. Tuir Planu asaun formasaun ba Literasia Digital hahú husi 9 no sei termina iha loron 17 fulan maiu 2023.
Iha tempu hanesan asaun formasaun hala’o mos ba 10 funsionáriu Parlamentar husi Divizaun Apoiu Plenáriu, ho matéria Prosesu Parlamentar, prinsipalmente liga ho Prosesu Lejizlativu Komún, Prosesu Lejizlativu Espesiál no Prosesu Orientasaun no Fiskalizasaun Polítika iha kontestu Konstituisaun no Rejimentu Parlamentar. Tuir planu formasaun ne’e sei hala’o durante loron 2, hahú husi loron 9 to’o 10 fulan maiu, iha sala formasaun Fundasaun Oriente Dili, konta ho formador husi Sentru Formasaun rasik, Señór Armando Machado, eis Diretor Apoio Parlamentar no Xefe Divizaun Apoiu Plenária. FIM
