Pagina Inicial»Noticia
Parlamentu Nasionál liu husi Sekretariadu Jerál organiza debate Parlamento dos Jovens ba edisaun daruak, iha loron 26 too 28 fulan abril tinan 2023, iha Parlamentu Nasionál.
Debate Parlamento dos Jovens ne’e partisipa husi estudante sira munisípiu 14, ne’ebé kada munisípiu reprezenta husi estudante na’in tolu (3), ho total na’in haatnulu resin-rua (42) ne’ebé hetan selesaun liu husi debate iha nivel munisípiu.
Iha loron dahuluk, estudantes Parlamento dos Jovens ne’e hetan esklaresimentu husi ekipa traballu no reprezentante husi Parlamentu Foinsa’e no eskola portuguesa Ruy Cinatti Díli, kona-ba lala’ok no funsionamentu diskusaun too aprovasaun projetu rekomendasaun sira iha sala komisaun no sala plenária.
Iha loron daruak, deputadu estudante sira ne’e fahe ba grupo tolu hodi halo debate ba projetu rekomendasaun sira inklui aprova perguntas ba Deputadu sira Parlamentu Nasionál ne’ebé akompaña direta sesaun refere, antes hili estrutura Meza Parlamento dos Jovens.
Hafoin ida-ne’e, iha loron datoluk, deputadu estudante sira inisia debate iha sesaun plenária ho abertura husi Vise-Sekretária Meza Parlamentu Nasionál, Deputadu Antonio N. M. Amaral Tilman, akompaña husi Prezidente Grupo Jovens Parlamentares, Deputadu José Virgilio R Fereira, Prezidente Komisaun G, Deputadu Antonio Verdial de Sousa no Deputada Elvina Sousa.
Debate refere termina ho aprovasaun projetu rekomendasaun hodi entrega ba Prezidente Parlamentu Nasionál liu husi Vise-Sekretária Meza, Deputadu Antonio N. M. Amaral Tilman.
Tema ba diskusaun edisaun daruak ne’e mak «Trabalho Infantil», durante debate estudantes deputadu sira hamosu rekomendasaun no perguntas ba Deputadu efetivu sira hodi envia ba Governu. FIM
