Pagina Inicial»Noticia
Sekretáriadu Jerál Parlamentu Nasionál liu husi nia ekipa traballu hamutuk ho Ministériu Edukasaun Juventude no Desportu halo abetura ba atividade Parlamento dos Jovens, iha nível munisipal ne’ebe hahú iha Munisipiu Dili, iha loron 28 fulan marsu tinan 2023, iha salaun Ian Martin Infordepe Díli.
Parlamento dos Jovens ne’e distina ba estudante sira nível ensinu pre-sekundáriu, sekundáriu no tekniku vokasional sira iha teritoriu Timor-Leste, ne’ebe tema ba diskusaun ba tinan ida-ne’e mak Traballu Infantil.
Abertura ba diskusaun nível munisipal ba munisipiu Díli ne’e hetan partisipasaun maximu husi estudante sira iha Munisipiu Díli liu estudantes 90 ne’ebe reprezenta kada eskola iha estudante na’in 3.
Iha intervensaun Sekretáriu Jerál Adjunto Parlamentu Nasionál, João Rui Amaral, Ministru Edukasaun Juventude no Desportu, Armindo Maia, no reprezentante UNICEF koalia kona-ba importansia husi atividade ka programa Parlamento dos Jovens ne’e, oinsá konsensializa estudante sira bele partisipa ativa iha prosesu demokratizasaun no desenvolvimento nasionál.
Husi debate refere, sei selesiona estudante na’in 3 atu rezprezenta estudante sira iha Munisipiu Díli hodi partisipa iha sesaun debate Parlamento dos Jovens iha loron 27 too 28 fulan abril tinan 2023, iha Parlamentu Nasionál.
Hafoin debate iha Munisipiu Díli, ekipa traballu husi Sekretáriadu Parlamentu Nasionál hamutuk ho ekipa traballu husi Ministeriu Edukasaun Juventude no Desportu dezloka ba munisipiu 13 hodi organiza debate no selesiona estudante sira hodi partisipa iha sesaun debate iha Parlamentu Nasionál.
Total participantes ka estudantes deputadus ba tinan 2023 ne’ebe sei partisipa iha sesaun debate Parlamento dos Jovens ne’e hamutuk 42.
Atividade Parlamento dos Jovens ne’e realiza ba daruak, ne’ebe hahú ona edisaun dahuluk iha tinan 2019 liu bah o topiku ba debate mak Meio Ambiente. FIM
