Pagina Inicial»Noticia
Sekretáriadu-Jerál Parlamentu Nasionál, liu husi Divizaun Sentru Formasaun, organiza kapasitasaun ba funsionariu-sira ho kategoria profisionál Assistente (Grau F no G) ba promosaun karreira.
Lei nú 10/2016, loron 8 fulan Jullu, aprova Estatutu Funsionáriu Parlamentar, ne’ebe altera husi Lei nú 5/2023, loron 25 fulan janeiru, termina kategoria profisionál asistente ne’ebe previstu iha Estatutu aprovadu iha tinan 2016 nian. Eliminasaun ba kategoria ida-ne’e, rejulta funsionariu-sira ne’ebe durante ne’e asume postu asistente, sei pasa ba ezerse funsaun iha Administrativu Parlamentar.
Molok pasa ba ezerse funsaun iha konteúdu funsionál kareira Administrativu Parlamentar, importante tebes atu reforsa no haklean koñesementu tekniku iha área servisu administrativu-nian, hodi nune’e funsionariu hirak ne’e bele intende diak-liutan ba servisu ne’ebe sira sei dezempeña hafoin promosaun.
Kaer ba importânsia refere iha leten no proposta husi Divizaun Dezenvolvimentu Rekursu Humanus, Sentru formasaun, tuir kompetensia funsionál, prepara planu formasaun ba kapasitasaun ho materia oi-oin asosiadu ho konteudu funsionál Administrativu Parlamentar-nian.
Nune’e, hahú ohin, loron 27 fulan marsu to’o fulan juñu, oras rua kada loron, Sentru Formasaun sei fornese formasaun ba funsionáriu hamutuk nain 19.
Materia iha formasaun sei inklui, Estatutu Funsionariu Parlamentar (Direito no Dever), Lei Organizasaun no Funsionamentu Administrasaun Parlamentar, dokumentasaun administrativo, workshop português para fins espesifiku, literasia digital, inklui sirkuitu korespondensia iha Parlamentu Nasionál. FIM.
