Pagina Inicial»Noticia
Parlamentu Nasionál, liu husi sesaun plenária ordinaria iha loron 20 fulan marsu tinan 2023, halo apresiasaun foun ba Dekretu Lei nú 78/V Parlamentu Nasionál kona-ba alterasaun da-limak ba Lei nú 6/2006 loron 28 fulan dezembru, Lei Eleitoral ba Parlamentu Nasionál, ho 37 votu a favor, 24 kontra no 2 abstensaun.
Votu refere hanesan apresiasaun foun ba Dekretu Parlamentu Nasionál ne’ebe Prezidente Repúblika veta. Nune’e hafoin aprovasaun, Meza Parlamentu Nasionál liu husi Gabinete Prezidente Parlamentu sei envia hikas ba Prezidensia Repúblika hodi halo promulgasaun tuir lei haruka.
Iha sesaun plenária ne’e mós halo aprezentasaun ba relatóriu no pareser kona-ba Lei nú 44/V (4a) Lei Finansas Munisipal inklui Lei nú 51/V(5a) kona-ba Medida Tutela Legalidade Urbanistika nian. No aprova mós iha final global ba Projetu Lei nú 49/V(5a) kona-ba Lei Baze Ekonomia Sosial, ho 40 votus a favor, 0 kontra no 8 abstensaun.
Entretantu iha intervensaun diversa nian, Deputadu sira kontinua sujere ba Governu atu fó atensaun maximu ba estrada sira liuliu hirak ne’ebe konsidera emerjensia atu la bele difikulta movimentasaun transporte no komunidade sira, atualizasaun kartau eleitoral inklui asuntu importante sira seluk.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, no hetan prezensa husi Ministru Asuntu Parlamentar no Komunikasaun Sosial, Francisco Martins da Costa Pereira Jerónimo. FIM
