Pagina Inicial»Noticia
Parlamentu Nasionál halo debate liu husi sesaun plenária ordinária, iha loron 14 fulan marsu tinan 2023 ho Ministériu Solidadridade Sosiál no Inkluzaun, ne’ebe reprezenta husi Vise-Ministra MSSI, Signi Chandrawati Verdial, kona-ba implementasaun Estratejia Nasionál ba Protesaun Sosial ne’ebe aprova husi Governo iha fulan novembru tinan 2022.
Antes realiza debate ho MSSI, Deputadu sira halo uluk apresiasaun ba relatóriu fiskalizasaun husi Komisaun G ne’ebe trata asuntu Edukasaun, Juventude, Kultura no Sidadania ba Munisipiu Ermera, Covalima no Ainaro.
Hafoin ida-ne’e Meza Parlamentu Nasionál halo anunsiu no hatun Lei nú 52/V(5a) kona-ba Ordem ba Mediku Timor-Leste ba Komisaun A ne’ebe trata asuntu Konstitusional no Justisa, inklui hatun Lei nú 52/V(5a) kona-ba Abitasaun no Alojamentu ba Komisaun E ne’ebe trata asuntu Infraestrutura hamutuk ho Komisaun D no C, hodi halo apresiasaun inisial, relatóriu pareser no relatóriu setoriál kona-ba lei refere durante loron 15 antes aprezenta ba plenaria hodi halo diskusaun no votasaun .
Entretantu iha intervensaun diversa nian, Deputadu sira kontinua preokupa kondisaun estrada sira hanesan estrada Lequidoe no Daisoli Munisipiu Aileu ne’ebe aat, la iha ponte nune’e difikulta movimentu estudante sira nian hodi tuir prosesu aprendijajen iha tempu udan no la bele fa’an produtu lokal ba merkadu sentral, inklui asuntu importante sira seluk.
Reuniaun Plenaria ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membro Meza sira. FIM
