Pagina Inicial»Noticia
Parlamentu Nasionál liu husi sesaun plenaria ordinaria iha loron 13 fulan marsu tinan 2023, halo diskusaun no aprovasaun iha final global ba Projetu Lei nú 51/V(5a) Alterasaun da-ruak ba Lei Feriadu Nasionál no Data Ofisiál Komemorativu sira ho 37 votus a favor, 0 kontra no 12 abstensaun.
Parlamentu Nasionál mós halo diskusaun no votasaun votu pezar ba saudozu Martinho Maia Sarmento ho 37 votus a favor, 0 kontra no 0 abstensaun, nu’udar rekoñesimentu Estadu nian ba saudozu nian luta durante tempo rejisténsia no ukun rasik an.
Iha sesaun plenária ne’e mós Parlamentu Nasionál halo aprezentasaun relatóriu kona-ba partisipasaun Timor-Leste ba dahuluk iha Konferensia Europeia ne’ebe apoiu solidaridade ba povo Saharawi, ne’ebe realiza iha Berlin, Alemanha, iha loron 2 too 3 fulan dezembru tinan 2022.
Entretantu iha intervensaun Deputadu sira nian, Deputadu sira kontinua preokupa no husu ministériu relevante sira atu tau atensaun maximu iha area infraestrutura hanesan estrada sira husi munisipiu ba postu administrativu sira, subsidiu $200.00 ne’ebe sei iha reklamasaun husi família balun, aumenta sentru votasaun iha area rural sira iha eleisaun parlamentar tinan 2023, kontinua rezolve problema kontratu profesor no problema lixu iha kapital Díli no Suku Tibar.
Deputadu sira mós husu atu Diresaun Nasional Transporte Terrestre atu muda zebra crossing Pasadeira dook oituan husi kruzamentu, tamba distansia zebra crossing ne’ebe agora daudaun besik hela kruzamentu ne’ebe fó ameasa ba motorista sira nune’e mós sidadaun hirak ne’ebe hakat liu husi zebra crossing ne’e.
Reuniaun Plenaria ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no konta ho prezensa husi Sekretáriu Estadu Komunikasaun Sosiál, Mericio Juvenal Akara. FIM
