Pagina Inicial»Noticia
Komisaun E ne’ebe trata asuntu Infraestrutura iha Parlamentu Nasionál, halo atividade fiskalizasaun, iha loron 8 fulan marsu tinan 2022 iha munisipiu Ainaro.
Fiskalizasaun ida-ne’e lidera husi Vise-Prezidente Komisaun E, Deputadu Fabião Oliveira akompaña husi membru komisaun sira ho objetivu atu hatene prosesu implementasaun projetu Uma Naronam ba Povo (UNP) no Uma kbi’it Laek + (UKL+ ) ne’ebe implementa husi Projetu Nasionál Dezenvolvimentu Suku (PNDS) liu husi Orsamentu Jerál Estadu (OJE) ba tinan 2022 inklui kontinuasaun implementasaun ba OJE tinan 2021.
Além de projetu UNP, halo mós fiskalizasaun ba projetu sira seluk hanesan projetu Nasionál Dezenvolvimentu Munisipal, Projetu Eletrisidade , Obras Publika liga ba Estrada iha Munisipiu Ainaro no BTL.ep nian.
Iha reuniaun ho Sekretária Administrador Munisipiu Ainaro, Olga Mendonça, ho reprezentante liña ministerial sira hatete objetivu fiskalizasaun refere atu observa diretamente prosesu konstrusaun sira husi projetu hirak ne’ebe realiza iha munisipiu refere, no rona mós preokupasaun sira husi autoridade kompetente sira atu bele melhoria iha futuru.
Diretora PNDS Munisipiu Ainaro, Regina de Araujo hatete, prosesu dezenvolvimentu UNP kuaze lao diak inklui implementasaun UKL+ iha baze kontinua hetan monitorizasaun no akompañamentu husi ekipa PNDS munisipiu nian.
Iha loron tuir mai, ekipa Komisaun E kontinua halo fiskalizasaun hodi observa konstrusaun projetu sira hanesan UNP, UKL+ inklui projetu sira seluk antes fila ba Díli hodi haree konstrusaun projetu estrada iha Suku Comoro ne’ebe responsabiliza husi empreza Mejori. FIM
