Pagina Inicial»Noticia
Parlamentu Nasionál, liu husi plenaria ordinari iha loron 27 fulan fevereiru tinan 2023, iha período antes ordem do dia nian halo votus pezar ba saudozu Paulino Dias “Lemorai” ho 34 votus a favor, 0 kontra no 0 abstensaun, hanesan rekoñesimentu ba kontribuisaun saudozu nian ba luta libertasaun nasionál.
Hafoin votu pezar, iha intervensaun diversa nian, Deputadu sira kontinua preokupa ho nesesidade povo nian iha teritoriu tomak, hanesan estrada iha Munisipiu Ermera, Lautem, no estrada ligasaun Manatuto ba Natarbora, Natartbora ba Same no Viqueque inklui estrada parte Viqueque Vila ba Watulari no Watukarabau. Deputadu sira husu atu Ministériu Obras Públikas no Institutu Jestaun no Ekipamentus nian hodi fó atensaun ba problema estada sira no asegura projetu tuir kontratu ne’ebe iha.
Elém de estrada, Deputadu sira, kontinua husu Ministeriu Edukasaun atu rezolve problema rekrutamentu profesor kontratadu sira nian ne’ebe sei sai polemika iha sosiedade no husu ministériu, asegura kontinuidade prosesu aprendizajen ba estudante sira ne’ebe nia eskola sira la iha profesor ida tama iha lista, no asuntu sira seluk.
Iha período da ordem do dia nian, plenaria diskusaun no votasaun ba Prosposta Rezolusaun Parlamentu Nasionál nú 25/V(5a) kona-ba aprova konvensaun entre Repúblika Demokrátika Timor-Leste ho Repúblika Portugueza kona-ba Seguransa Sosiál ne’ebe maka asina ona iha Dili, loron 28 fulan juñu tinan 2022, ho 38 votus a favor, 0 kontra no 0 abstensaun, inklui diskusaun no votasaun ba Prosposta Rezolusaun Parlamentu Nasionál nú 26/V(5a) kona-ba aprova Konvensaun Multilateral Seguransa Sosiál Komunidade Nasaun Lian Portugeza nian (Comunidade dos Países de Lingua Portugues) CPLP, ho 38 votus a favor, 0 kontra no 0 abstensaun.
Hafoin ida-ne’e kontinua kedas ba diskusaun no votasaun iha jeneralidade ba Projeto Lei nú 48/V(5a)- Alterasaun dahuluk ba Lei 7/2022, loron 19 fulan maiu, ne’ebe aprova Estatutu Ministériu Públiku ho 37 votus a favor,0 kontra no 0 abstensau. FIM
