Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, fó pose ba Prezidente eleitu ba Konsellu Imprensa, Otelio Ote ho nia membru ida husi reprezentante journalista sira, Amito Qonusere Araujo, ba períodu 2023-2025. Tomada de posse ne’ebe realiza iha loron 23 fulan fevereiru tinan 2023, iha sala konferensia Parlamentu Nasional ne’e, akompaña husi reprezentante bankada parlamentar sira no hetan prezensa husi Ministru ba Asuntu Parlamentar no Komunikasaun Sosial, Francisco Martins da Costa Jeronimo, inklui estrutura Konsellu Imprensa nian, no konvidadu sira seluk.
Prezidente Parlamentu Nasionál hatete Lei numeru 5/2014 kona-ba Komunikasaun Sosial, ne’ebe konsidera katak direitu ba informasaun , liberdade espresaun no imprensa hanesan fundamentu ida ba konsolidasaun demokrasia, tamba ne’e Estadu liu husi Parlamentu Nasionál aprova lei ida-ne’e hodi bele reforsa komunikasaun sosial iha Timor-Leste hodi asegura direitu umanu ba liberdade asesu informasaun liu husi media sira iha Timor-Leste.
Tanba ne’e husu ba estrutura konsellu imprensa foun ne’ebe lidera husi nia Prezidente eleitu, atu bele servisu ho integridade, imparsial no profesionál iha área komunikasaun sosial, nune’e liu husi media sira bele ajuda fó informasaun ne’ebe konstrutivu iha Estadu Repúblika Demokrátika ida-ne’e. Além de serimónia tomada de posse ne’e, iha loron hanesan Komisaun Espesializada Permanente sira mós kontinua hala’o nia atividade ba fiskalizasaun no apresiasaun relatório atividade. FIM
