Pagina Inicial»Noticia
Parlamentu Nasionál liu husi sesaun plenária ordinária iha loron 6 fulan fevereiro tinan 2023, aprova ona iha jeneralidade ba Proposta Lei n.o 50/V(5ª) – alterasaun dalimak ba lei n.o 6/2006, loron 28 fulan dezembro, ne’ebe aprova Lei Eleitoral ba Parlamentu Nasionál, ho 38 votus a favor, 0 kontra no 13 abstensaun.
Diskusaun no aprovasaun jeneralidade ne’e partisipa husi Ministru Administrasaun Estatal, Miguel Pereira de Carvalho, akompaña husi CNE no STAE.
Durante diskusaun, Ministru Administrasaun Estatal aprezenta razaun Governu nian tanba saída mak halo alterasaun ba lei refere. Tanba tuir Governu presija iha partisipasaun maximu husi populasaun sira atu ezerse nia direitu votu, nune’e presija kria kondisaun legal atu ema hotu bele partisipa maximu iha prosesu eleisaun.
Proposta lei ne’e sei hahu nia diskusaun iha espesialidade iha loron 8 fulan fevereiro antes aprezenta ba plenária hodi halo aprovasaun final global.
Iha período de antes da ordem do dia nian, Deputadu sira preokupa kona-ba kondisaun estrada sira ligasaun munisipiu ba postu administrativu sira ne’ebe barak liu iha kondisaun aat, bolsa mérito ba estudante sira, professor kontratadu sira inklui asuntu sira seluk. FIM
