Pagina Inicial»Noticia
Parlamento Nacional liu-hussi Secretariado-Geral Parlamento Nacional realiza seminário ho tema ‘’Hakbesik Parlamento Nacional ba Comunidade Aileu, Natureza no Funcionamento Órgão Soberano’’, iha Salão Paroquial, Paróquia S. Pedro e S. Paulo, iha loron 26 too 27 fulan setembro tinan 2019.
Seminário ne’e ho objetivo atu partilha informação sira relação ho competência no funcionamento Parlamento Nacional ne’ebé loke direitamente hussi Secretária-Geral Parlamento Nacional, Cedelizia Faria dos Santos.
Iha intervenção, Secretária-Geral haktuir, durante loron rua ne’e, Secretariado sei hakbessik produto-de-serviço representante povo iha Uma Fukun Parlamento Nacional nian ba comunidade, no espera katak participante sira bele sai mensageiro ba sira ne’ebé la hola parte ba iha seminário refere.
Nune’e mós, Presidente Comissão F, Deputada Maria Gorumali Barreto, iha nia intervenção hatete liu hussi seminário ne’e bele refresca no eleva conhecimento comunidade sira Município Aileu nian kona-ba competência no funcionamento Comissão F ne’ebé trata assunto Educação, Saúde e Igualdade de Género iha Parlamento Nacional.
Ho ida ne’e, nu’udar Presidente Comissão nian iha esperança boot ba comunidade sira, liuliu autoridade municipal, diretor sira, linha setoriais, líder comunitária, juventude hussi Conselho Nacional Juventude Aileu, estudante sira hussi Escola Secundária Geral Malere, Escola Técnico Vocacional, no Escola S. Paulo e S. Pedro, bele compreende no inteira informação hotu, ne’ebé partilha hussi representante povo iha Uma Fukun Parlamento Nacional, hanessan Presidente Comissão F, representante Comissão A, Dirigente no Técnico sira hussi Secretariado durante loron rua.
Sorin seluk, Secretária de Administração Município, Victorina M. do Rêgo, ne’ebé representa Administrador Município iha nia intervenção hatete, seminário ne’e serve hanessan meios ida atu enriqueça conhecimento participante sira hussi camada sociedade oioin hussi município refere, hodi fó apoio ba preparação iha processo descentralização no poder local ne’ebé sei entrega hussi Governo central.
Matéria ba seminário ne’e mak, Competências no Funcionamento Comissão F no Competências no Funcionamento Comissão A Parlamento Nacional, Processo Legislativo Comum, Processo Orçamento Geral do Estado, Conhece Órgão sira iha Parlamento Nacional no nia Função, Funcionamento Comissões Especializadas Permanentes iha Parlamento Nacional, no Processo Legislativo, ho nia orador sira hanessan Presidente Comissão F, representante Presidente Comissão A, Dirigente no Técnico sira hussi Secretariado-Geral Parlamento Nacional.
Seminário ne’ebé atu alcança missão ‘’Lori Parlamento Nacional ba Cidadão’’ ne’e, hetan mós recomendação hussi representante Comandante PNTL Município Aileu, António Soares, katak seminário hanessan ne’e ba futuro precisa realiza iha posto administrativo sira, no convida mós coordenador sira partido político nian nune’e bele inteira competência no funcionamento Parlamento Nacional, hodi sira bele orienta militante no simpatizante sira atu labele cria instabilidade iha rai laran.
