Pagina Inicial»Noticia
Parlamento Nacional liu hussi Sessão Plenária durante loron rua hahú iha loron 17 too 18 fulan setembro tinan 2019, aprova ona nia orçamento privativo ba tinan 2020 nian liu hussi Projeto de Resolução n.o 36/V (2ª), ho montante milhões $16.486.896.
Projeto de Resolução ne’e aprova ho 34 votos a favor, 11 contra no 5 abstenções.
Montante inicial ne’ebé Governo fó ba Parlamento Nacional ba tinan 2020 nian mak liu milhões $14 no iha elaboração Orçamento no Plano ne’ebé Secretariado Parlamento Nacional halo iha fulan kotuk, haree mós ba Plano estratégico Parlamento Nacional nian prevê milhões $19.432.365.
Hussi montante refere Conselho de Administração discute durante loron tolu iha semana kotuk no aprova ho total milhões $17.909.531, hodi apresenta ba Plenária liu hussi Comissão C ne’ebé prepara relatório no parecer.
Nune’e liu hussi discussão naruk durante loron rua, Deputado sira decide hodi reduz orçamento ba viagem estrangeiro, nune’e hussi montante inicial ne’e reduz ba milhões $16.486.896.
Ho ida-ne’e, hussi montante refere Parlamento Nacional sei haruka ba Governo hodi tau iha Orçamento Geral de Estado 2020.
Durante discussão, Deputado hussu atu continua melhoria serviço Parlamento Nacional tuir constituição haruka inclui serviço secretariado nian hodi fó atendimento ne’ebé di’ak liu tan.
